यी हुन सात प्रदेशका सम्भावित राजधानीमा, जहाँ एमाओवादीले प्रदेश कार्यालय राखिसक्यो

काठमाडौं, संघीय प्रदेशअनुसार पार्टी संरचना बनाएको एकीकृत नेकपा माओवादीले आफ्ना प्रदेशका सम्भावित राजधानीमा प्रदेश कार्यालय स्थापना गरेको छ । सात प्रदेशमध्ये दुई नम्बर प्रदेशको कार्यालय स्थापना गर्न बाँकी छ ।
१ नम्बर प्रदेशबाहेक पाँचवटा प्रदेशको कार्यालय सम्भावित राजधानीमा राखिएको नेताहरूले बताएका छन् । १ नम्बर प्रदेशको पार्टी कार्यालय विराटनगर, ३ को काठमाडौँ, ४ को पोखरा, ५ को दाङको घोराही, ६ को सुर्खेतको वीरेन्द्रनगर र ७ नम्बर प्रदेशले धनगढीमा पार्टी कार्यालय स्थापना गरेको छ । २ नम्बर प्रदेशको काम महोत्तरीको बर्दिबासबाट सञ्चालन भइरहे पनि कार्यालय स्थापना गरिएको छैन ।
एमाओवादी नेताहरूले पार्टी कार्यालय अन्तरिमकालका लागि स्थापना गरिएको बताएका छन् । ‘अहिले स्थापना गरिएका पार्टी कार्यालय अन्तरिमकालका लागि हुन्,’ स्थायी समिति सदस्य एवं ५ नम्बर प्रदेश इन्चार्ज चक्रपाणि खनालले भने, ‘भोलि प्रदेशको राजधानी जहाँ हुन्छन्, पार्टी कार्यालय पनि त्यहीँ हुन्छन् ।’ 

11:02 AM