बारा ३० गते पुस,
नेपाल साधु महासंघ केन्द्रिय कार्यालयद्धारा आज कलैयामा पत्रकार सम्मेलन गरि २०६३ साल जेठ ४ गते सुनियोजित तरिकाबाट नेपालमा हिन्दू राष्ट्र हटाएकोमा कडा आपत्ति जनाएका छन् ।
साधु महासंघका केन्द्रिय संरक्षक बाबा सेवक सौरभनाथले ईसाई धर्मावलम्बीहरुको इशारामा र नेपालका आफुलाई ठूला भनाउदा नेताहरुले पैसा खाएर नेपाललाई धर्मनिरपेक्ष घोषणा गरेको आरोप लगाए । विश्वको १०० करोड हिन्दूहरुको एक मात्र हिन्दू राष्ट्र नेपाल आस्थाको केन्द्र रहेको बताउदै हाल नेपालमा ८ हजार १ सय चर्च बनाई इसाईहरुले तीव्र गतिमा धर्म परिवर्तन गराई रहेको बताएका थिए ।
नेपाललाई हिन्दु राष्ट्र कायम नगरिए सम्म नेपाल साधु महासंघले आन्दोलन जारी राख्ने बाबा सौरभनाथले बताए ।
पत्रकार सम्मेलनमा साधु महासंघ केन्द्रिय अध्यक्ष मदन मोहनदास, महासचिव झण्डा बाबा, वरिष्ठ सल्लाहकार रामकिशुन बाबा, बारा जिल्ला अध्यक्ष महेन्द्र दास वैरागी लगायतको उपस्थिति रहेको थियो । रिर्पोटर्स क्लब बाराका अध्यक्ष सिकेन्द्र पासवानको सभापतित्वमा सम्पन्न कार्यक्रम अनिल गुप्ताले सहजीकरण गरेका थिए । नेपाल साधु महासंघले माघ ४ गते पथलैयामा राजमार्ग बन्द गर्ने कार्यक्रम सार्वजनिक गरेको छ ।
